Pecché si accussì bella, ne, pecché? Chisti uocchie lustri manco nu sciucquaglio ‘e oro ‘sti mmane cchiù preziose ‘e nu tesoro ca si me disse ‘na carezza, ne iesse stiso ‘nterra pe’ ‘a priezza. Quanno me parli e riri, me fai scuppià ‘stu core ‘na curtellata ‘mpietto senza senti’ dulore. Pecché si accussì bella, ne, pecché? Tu si’ a reggina ca po’ fa ogne ommo re nu principe consorte a chi tene a fortuna ‘e ave’ ‘sta ciorta surdato ‘e truppa e ‘nzieme ‘mperatore a chi cumbatte ‘a guerra ppe ‘st’ammore. ‘Sta vita mia l’hai fatta addiventà nu suonno e si nun te pozzo ave’, nennella mia, ca m’he ‘mbriacato comme si fussi vino, m’addormo allerta, e sonno ‘e te tenè vicino.
Je t’addesidero comme a chi vo’ ‘a dummeneca tutte ‘e juorni d’a semmana e quanno sagliute ‘e scale d’a casa toja cu ‘sti ciure ‘mmano e ‘o core ca me sbatte ‘mpietto, te veco ca me aspiette allerta annanz’ ‘a porta, pure si fòre ‘o cielo è niro e chiove forte, ’st’anema sgarrupata accummencia a fa ‘e crapiole. E tanno sì ca schiara ‘na jurnata ‘e sole.
Tu si’ ‘na bambulella de chelle cu ‘o vestito ricamato de seta janca tutte a trini e pizzilli e cu ‘e scarpetelle cusute a ‘mmano da ‘na femmena gentile. ‘Na bambulella cu ‘na frangia de oro, ca fa arriva’ ‘e capille quasi fino all’uocchie ca luceno pure quanno ha fatto scuro. Tu si ‘na bambulella de chelle ca me ‘ncantasse a guarda’ ‘a sera ‘ngoppo ‘o cummo’, primma de piglia’ suonno, ‘na bambulella ca me strigno forte ‘mpietto ogne ‘bbota ca penzo ca nun starrai maie cu ‘mmè. Tu si ‘na bambulella, ‘a bambola ‘cchiù bella, de chelle ca ‘sta vucchella de porcellana rosa ‘a regnesse de vasi pigliannome pe’ fesso ca ‘e stongo ranno a te.
E allora sì, sì, ca t’abbraccio forte, t’astregno accussì forte a te fa ‘mmanca’ ‘o ciato, ma me l’aie chierere tu pecchè ‘a quanno te ne si’ ghiuta so’ addiventato scemo, e tanta cose nun ‘e capisco cchiu’. Nun ave’ paura. Stiennele ‘sti braccia, io stongo ‘cca’ nun me ne vaco. Io c’aggio sempe stato. Vieni, vieni ccà, fatte leva’ sti capille ‘e oro annanze all’uocchie, ca te voglio guarda’ ancora. M’aggio sfasteriato ‘e te sunnà sultanto. Io voglio sta’ scetato!
E allora sì, sì, ca t’abbraccio forte. Stiennele ‘sti braccia, fatte ‘na risata e arape ‘o core, io stongo ‘cca’ nun me ne vaco. Io c’aggio sempe stato, pecchè tu, nenne’, si’ troppa bella, ‘o ‘bbuo’ cape’ o no ca over si’ ‘a cchiu’ bella, e chesto m’è abbastato pe’ me fa ‘nnammura’.
‘Stu core nobbile, ca fosse conte, principe o marchese, vulesse addiventa’ re e ‘ppe chesto ca s’è ‘mmiso ‘mbraccio a ‘tte. A ‘tte, ca si’ ‘a reggina e quanno te ‘o miette ‘nzino, a ore a ore, ‘stu core mio nun addiventa re: l’aie fatto ‘mperatore!
Stanotte t’aggio sunnata. Aggio sunnato ‘a faccia toia janca comme ‘o latte, ‘e capille luonghi e lisci, e l’uocchie chini ‘e cose belle. Aggio ‘ntiso ‘o ciato tuoio doce, t’aggio vista abballà, comme a ‘n angelo senza scelle. Tu stive ccà e me chiudive l’uocchie. Io vulesse rimane’ cecato pe te vasa’ tutte ‘e ‘nnotte e po’ ancora, ancora. Fino a quanno ‘stu scuro allummarra’ l’uocchie miei pe’ ‘e tuoie, io te vulesse tenere pe’ sempe vicino.
Stammatina maggio affacciato da’ fenesta ’e casa mia e aggio visto nu paraviso ‘e mare, sole, museca e ‘ssirene. ‘E tre prete ca tengo ‘e faccia so’ proprio chelle addò stevano pusate ‘sti creature d’ ‘o mito. Stongo accussì bello ca putesse pure muri’ pecchè sto pensanno ca tu nun si’ Parthenope, Leucosia e nemmanco Ligheia. Tu si’ ‘a mamma d’ ‘e ssirene. E si putesse turna’ a nascere n’ate mille vote ogne vota vulesse nascere Ulisse pe’ allucca’ cu ‘e cumpagne mie “Nun me attaccate all’arbero ‘e ‘sta nave, quanno e ‘ssirene cantano me voglio mena’ a mare pe’ me fa’ fa’ a piezze ‘a chella ca sta’ annascosa, ‘a chella ca quanno se fa’ vede’ me leva ‘o sanghe ‘a dinto ‘e ‘vvene: ‘a cchiu bella ‘e tutte quante, ‘a mamma d’ e’ ‘ssirene!”.
S’io fosse ‘nu mariuolo iesse a ‘rrubbà ppe te ‘nu mazzo ‘e rose, ‘n aniello cu ‘e brillanti e ‘na corona ‘e sposa. Po’ me futtesse e ‘pprete d’ ‘a cima d’ ‘o Vesuvio, nu centenaro ‘e cantare cu l’acqua ‘e Marechiaro pe te fa ‘na piscina arò tu stai ‘e casa e me ‘ncanta’ annascuso ‘ntramente te fai ‘o bagno. S’io fosse ‘nu mariuolo iesse a ferni’ ‘ngalera e llà alluccasse all’ate ca è sulo ppe te si stongo carcerato. S’io fosse ‘nu mariuolo e che mariuolo fosse, ‘nu povero ‘mbranato, ‘na meza tacca streveza. Tu, si’ ‘a mariola vera, ‘na mastra di valore, pecche’ sulo cu ‘ll’uocchie te si arrubbato ‘o core.
T’ ‘o voglio dicere int’ ‘a sta lengua mia napulitana, ca mamma’ m’ha ‘mparato ‘a piccirillo quanno ogne juorno m’astregneva ‘mpietto. E tutto chello ca è passato ‘a tànno nun m’ha ‘mparato sulamente a usa’ ‘sta lengua. M’ha fatto cape’ pure si è ‘o mumento ‘e dicere a ‘na femmena: si’ bella overamente, nun sulo pecchè tiene ‘sti capille ‘e seta e ‘a vocca ca fa addiventa’ zucchero ‘o veleno. Io te vulesse tenere vicino pe’ tutto ‘o tiempo ca ancora me rimane, sulo a te, t’ ‘o giuro, a niscun’ata. T’ ‘o sto ricenno int’ ‘a ‘sta lengua mia napulitana e si nun ‘a capisci, te fa strana, faccio parla’ l’uocchie, ‘e ‘mmane e ‘o core, pecchè int’ ‘a vita puo’ nun capi’ mai niente ma sulo ‘na parola te spiega tutte cose: ammore.
Tre ‘ccose so’ rimaste d’ ‘o paraviso, dicette ‘o poeta a tutto: ‘e stelle, ‘e sciure e ‘e criature. Pe’ ‘mme, ca nun songo tanto gruosso comme a isso, ‘sti tre ‘ccose songo ‘e stelle, ‘e sciure e tu. ‘E stelle ‘e tiene dinto a chisti uocchie ca ancora me guardano. ‘E sciure ‘e tiene ‘mmocca e cacciano l’addore quanno me parli. E po’ ‘nce stai tu ca si’ stella, sciore, criatura e paraviso. ‘Na vita senza e te me facesse ferni’ ‘nto ‘nfierno e si pure accussì fosse m’abbastasse ‘e cade’ ‘nterra acciso pe turna’ subbeto addu te, ‘nto paraviso.
